Специјално издание по повод 200 години од објавувањето на „Огледало“ од Пејчиновиќ

По повод 200-годишнината од објавувањето на книгата „Огледало“ од Кирил Пејчиновиќ, издавачката куќа „Силсонс“ од Скопје подготви специјално издание (Огледало за огледало), со напореден превод на современ јазик од Игор Калпаковски.

- Кон ова круцијално дело на македонската просвета, приредувачот проф. Борис П. Момировски Лешанин, објавува толкувања во кои ја нагласува историската улога на книгата за нашата духовна култура во изминатите два века, соопшти издавачот. 

Кирил Пејчиновиќ Тетоец (1771-1845) спаѓа во редот на големите македонски дејци, кои оставија длабоки траги во целокупната македонска духовна култура.

Покрај „Огледало“, која е отпечатена во Будим во 1816 година, Пејчиновиќ е автор и на книгите „Слово за празниците“ и „Утешение грешним“ кои имале непроценлива улога во просветувањето на македонскиот народ. Неговиот Епитаф, пак, литературната наука го смета за прва песна напишана во народен дух.