Спасовски: Најбезбедна земја на Балканот и намален криминалитет се дел од придобивките од членството во НАТО

Министерот за внатрешни работи Оливер Спасовски во интервју за Фронтлајн и Цивил медиа уште еднаш потврди дека безбедносната состојба во земјава е стабилна, без индиции за нарушување и инциденти од пошироки размери.

-Статистичките податоци за првите осум месеци од 2023 година говорат во прилог на ова што го истакнав. Вкупниот криминалитет за 11 проценти е намален во однос на истиот период од минатата година и тоа покажува дека не само што е стабилна состојбата, туку е индикатор којшто покажува дека сите врвни приоритети во делот на безбедноста се остаруваат. Секако дека ова се едни од најдобрите резултати што ги имаме во последните 30 години, потенцира Спасовски во интервјуто запрашан за главните предизвици за безбедносната состојба во услови на руската агресија врз Украина.

Спасовски, како што соопшти ресорното Министерството, потсетил дека и според истражувањата што ги прават регионалните и меѓународни институции кои се занимаваат со прашања од безбедноста, Република Северна Македонија е најбезбедна земја во Западен Балкан и е во друштво со 36 најбезбедни држави во светот.

Од аспект на безбедноста, имајќи ја предвид украинската криза, Спасовски потенцира дека тука најдобро се гледа важноста што Република Северна Македонија е веќе дел од НАТО алијансата.

- Оваа криза покажа дека многу е полесно кога имате силни партнери, да бидете заедно во сојуз којшто може да нѐ штити сите нас, колку е важно да имате гаранција за територијалниот интегритет, за суверенитетот на државата, за границите на државата, вели Спасовски.

Тој уверува дека сите институции во делот на безбедноста се ставени максимално во функција со цел да се сочува и унапреди безбедноста на државата.