Со автомобил влечел тинејџерки на санка во Србија, при падот тие биле прегазени од друго возило

Две тинејџерки на возраст од 16 и 17 години тешко се повредени кога врз нив налетал автомобил, откако паднале од санки кои нивниот пријател ги влечел со автомобил по снежна улица во село кај Краљево, Србија.

Страшната сцена се случила во четврток околу 22 часот, кога 19-годишник, возејќи автомобил „Volkswagen“ со условна возачка дозвола, влечел санки на кои биле девојките. Во еден момент тинејџерките паднале од санките и ги прегазил „Fiat“ кој не успеал да запре. Автомобилот го управувал 35-годишник, кој возел зад девојките за да не налета друго возило, објави „Telegraf“.

Двете девојки веднаш биле пренесени во болница во Краљево. Едната имала тешки повреди на нозете, а другата повреда на главата. Полицијата веднаш ги уапсила возачите, кои се товарат за тешки кривични дела против безбедноста на јавниот сообраќај.

На социјалните мрежи се појавила вознемирувачка снимка од несреќата, објавена од новинарот Младен Мијатовиќ. Непосредно пред несреќата се слуша како една од тинејџерките вика: „Кажи му да забави.“

„Никогаш не правете слично нешто. По снегот е тешко да се запре возилото, а несреќата може да се случи за една секунда. Малолетните девојки се тешко повредени, а двајцаата возачи се уапсени“, напиша Мијатовиќ на својот профил на Инстаграм.