Шилегов: Подигнати 600 кубни метри отпад од стрништата

Скопскиот градоначалник Петре Шилегов денеска информира дека има одлични резултати од спроведувањето на кампањата на Град Скопје за бесплатно чистење стрништа, поддржана од УНДП и MDC-TI-NET. Досега е лоцирано палење на повеќе локации, а тројца сторители се санкционирани со парична казна.

– Од 20 август до денеска бесплатно подигање на отпадот од бербата од Град Скопје имаат побарано над 120 жители на нашиот град при што се подигнати, а со тоа е и спречено палење на 600 метри кубни отпад. Град Скопје е прва единица на локална самоуправа што ја почна оваа кампања за елиминирање на палењето на нивите и стрништата со цел намалување на загаденоста на воздухот, зачувување на плодноста на почвата, но и спречување на ширење на евентуални пожари кои не ретко предизвикуваат серизони материјални штети, а понекогаш за жал и загуба на човечки животи, рече Шилегов на денешната прес-конференција.

Кампањата, која е кон крајот, Шилегов најави дека ќе продолжи следната година и ќе биде проширена на повеќе нивоа.

– Очекуваме дека Министерството за земјоделство, шумарство и водостопанство ќе се вклучи во делот на планирањето на периодите кога се врши бербата на различните земјоделски култури. Очекуваме и Скопскиот плански регион масовно да се вклучи во оваа кампања, имајќи предвид дека во Скопската котлина имаме сериозен дел од т.н. земјоделски општини, рече Шилегов.

Раководителот на секторот Инспекторат на Град Скопје Мирослав Богдановски информира дека првпат во функција ги пуштиле дроновите со кои се врши прелет на теренот.

– Формирани се екипи, патроли на терен составени од еден инспектор за животна средина, еден комунален инспектор и еден комунален редар. Продолжуваме со интензивните и засилените контроли на терен. Веќе нема „Тоа не е во моја надлежност“ и затоа патролите се од мешан состав и на терен, ако нешто се случи, имаме инспектор кој може да постапува, рече Богдановски. Додаде дека улогата на инспекторите на терен е и советодавна, односно да укажат за штетноста од палењето на отпадот и за тел. број 071/395-395, каде се врши бесплатно подигање на отпад.

Информира дека секојдневно се вршат контроли во скопските општини. Најголем број повици се од општините Сарај и Ѓорче Петров.

На прес-конференцијата беше прикажана снимка од еден инспекциски надзор, каде индентификувале лице кои врши спалување на таков вид отпад.