Шефот на дипломатијата на Србија: Нема да има санкции од ЕУ поради посетата на Вучиќ на Москва

Поради посетата на претседателот Александар Вучиќ на Москва во изминатите неколку дена, „нема да има прекин на процесите за интеграција на Србија во Европската унија, ниту санкции од Брисел. Тоа денеска го изјави српскиот министер за надворешни работи Марко Ѓуриќ. Тој додаде дека српската дипломатија покажала „доследност“ во изминатите неколку дена.

Во изјава за РТС Ѓуриќ нагласи дека во наредните денови претседателот на Европскиот совет, Антонио Кошта, и шефицата на дипломатијата на ЕУ, Каја Калас, ќе го посетат Белград, и очекува зајакнување на односите со Брисел, што „нема да биде на сметка на избалансираната надворешна политика на Србија“.

„Нема да има прекин на (европската) интеграција ниту санкции, тоа наскоро ќе се види, дека можеме само да очекуваме континуиран развој“, рече Ѓуриќ.

Шефот на српската дипломатија додаде дека Србија сака да го забрза развојот на односите со САД, дека претстои стратешки дијалог со официјален Вашингтон, како и дека го очекува доаѓањето на новиот американски амбасадор.

Ѓуриќ, исто така, најави дека во блиска иднина ќе биде објавена голема покана под името „Биди српски дипломат“, преку која студенти и експерти ќе бидат поканети да се приклучат во редовите на српската дипломатија, преку која Србија сака да „го прошири своето присуство во клучните геополитички центри“.