Еден од најголемите и најславните аргентински клубови, Ривер Плата од Буенос Аирес, го тресе голем скандал кога било откриено дека некои членови на помладите категории со години биле сексуално малтретирани.

Раководство на Ривер Плата во официјалното соопштение објави дека клубот ќе соработува со властите и на полицијата ќе ѝ овозможи логистичка поддршка кога една невладина организација открила дека повеќе малолетници со години биле сексуално малтретирани.

„Клупскиот доктор знаел дека децата што живееле во кампот биле сексуално малтретирани“, рекол на прес-конференцијата Андрес Боницалси, адвокат што им дава правна помош на жртвите на сексуално насилство.

Тужбата била поднесена до полицијата во Буенос Аирес од страна на Асоцијацијата на жртвите на сексуално насилство (АВИВИ), а се однесува на сексуална злоупотреба на младите играчи на Ривер Плата во периодот од 2004 до 2011 година, објавија аргентинските медиуми.

„Сè уште не ги знаеме сите детали од обвинението, но клубот ќе соработува со правосудните органи и обвинителството за да може да биде спроведена истрагата“, рекол секретарот на Ривер Плата, Игнасио Вањероел.

Весникот „Ла Насион“ тврди дека тужбата е поднесена по информацијата на засега анонимен клупски доктор, кој неколку години работел во клубот и кој го пријавил случајот.