СЕХА ги објави групите за новата сезона

 

 

 

Раководството на регионалната СЕХА лига, денеска ги објави групите, за новиот формат на натпреварување во оваа ракометна конкуренција. 

 

Актуелниот шампион Вардар, одбраната на титулата ќе ја започне во првата група во која за противници ќе ги има Нексе (Хрватска), Татран Прешов (Словачка), Војводина (Србија), Мотор Запорожје (Украина) и новајлијата во оваа конкуренција Татабања (Унгарија). 

 

Вториот македонски претставник, воедно и дебитант во СЕХА, битолски Еурофарм Работник ќе биде во група со Веспрем (Унгарија), ППД Загреб (Хрватска), Мешков Брест (Белорусија), Металопластика (Србија) и кинескиот тим Пекинг Спорт Универзити.

 

Премиерното коло од деветтото издание на СЕХА лигата е закажано за 3 и 4 септември. 

 

До крајот на годинава (14/15 декември) ќе се одиграат дуелите во групната фаза, а почнувајќи од февруари 2020-та, ќе започнат разигрувањата, односно плеј-офот. 

 

Завршниот „Фајнал-фор“ турнир е предвиден во периодот од 3 до 5 април 2020 година.