Седница на српскиот Парламент за избор на нова влада

Српскиот Парламент денеска попладне ќе одржи посебна седница за избор на нова влада, во која ќе има 19 министри, вклучувајќи и тројца без ресор.

Владата ќе ја предводи Српската напредна партија (СНС), три министерски функции ќе заземат коалициските партнери од Социјалистичката партија на Србија (СПС), додека во кабинетот ќе се наоѓаат и непартиски личности. Во новата влада која ја предложи мандатарот Александар Вучиќ ќе има осум нови министри во однос на претходниот состав.

Претседателката на Парламентот Маја Гојковиќ очекува сериозна расправа за новата влада, која треба да биде избрана до крајот на неделава.

Претставувањето на експозето, според најавите на Вучиќ, ќе трае повеќе часа, по што ќе следува дискусија за програмата на владата и избор на нејзините членови, а на крајот ќе се гласа.

Во кабинетот на Вучиќ, доколку биде изгласан во Парламентот, прв вицепремиер и министер за надворешни работи ќе биде Ивица Дачиќ, вицепремиер и министер за внатрешни работи Небојша Стефановиќ, вицепремиер и министерка за градежништво Зорана Михајловиќ и вицепремиер и министер за трговија Расим Љајиќ.

Во новата влада министер за финансии ќе биде Душан Вујовиќ, министер за правда Горан Кнежевиќ, за земјоделство Бранислав Недимовиќ, за образование Младен Шарчевиќ, за здравство Златибор Лончар, за труд Александар Вулин, за култура и информирање Владан Вукосављевиќ и за млади и спорт Вања Удовичиќ.

За министри без ресори ќе бидат именувани Јадранка Јоксимовиќ, Славица Ѓукиќ-Дејановиќ и Милан Кркобабиќ.