Се обновува хоризонталната патна сигнализација во Кавадарци

Се обновува хоризонталната сообраќајна сигнализација во Кавадарци. Од Службата за односи со јавноста при локалната самоуправа денеска информираа дека на асфалтна подлога најпрвин беше поставена црвена боја во правоаголна форма, која послужи како основа за нанесување на зебри со бела боја.

- На овој начин стручните служби од општината започнаа со примена на искуства од странство. Црвената подлога на пешачките премини е со двојна намена. Прво, како подлога која го продолжува векот на траење на белите линии, а потоа и како дополнителен визуелен ефект кој дава поголема видливост на пешачкиот премин, соопштија од прес службата.

За оваа цел општината има набавено 4 тони боја, за што се инвестирани 494.086 денари. За работна рака ќе се потрошат 470.000 денари.ж

- Општината со новиот приод кон нанесување на бојата очекува продолжен век на користење, а пред се подобрување на безбедноста на пешаците и останатите учесници во сообраќајот, нагласија од службата  за информирање. 

Освен на улците во градот, општината ќе ја обнови патната хоризонтална сигнализација и на локалниот пат Кавадарци-Ресава, на делницата од приклучокот со региналниот пат Кавадарци-Прилеп, до селото Ресава.