Само 15 лица во изолација се пријавиле за гласање во понеделник

Само 15 лица досега се пријавиле за гласање од самоизолација потврдуваат извори за Сител од ДИК. 

Иако во земјава има 3 579 активни случаи на заразени со Ковид-19, а вкупно 5000 лица имаат решенија за самоизолација од Државниот здравствен инспекторат. Интересот кај овие лица да се изјаснат на претстојните избори е речиси непостоечки. Рокот за пријавување истекува на 8-ми јули на полноќ, односно за 2 дена. Сите оние кои ќе добијат решенија за изолација по овој рок нема да можат да го искористат своето гласачко право.

За лицата во изолација е издвоен еден цел изборен ден во понеделник на 13-ти јули. Лицата кои ќе се пријават за гласање, а се во самоизолација ќе бидат посетени во своите домови од посебни избирачки одбори, составени од по тројца здравствени работници и претставници на партиите. Тие со скафандери, заштитни маски и средства за дезинфекција ќе одат во домовите на пријавените гласачи за да тие го остварат своето гласачко право. Покрај избрирачките одбори и гласачите ќе треба да носат заштитна опрема, при што на неколку секунди ќе ја извадат заштитната маска за да бидат идентификувани. 

На 14-ти јули ќе гласаат болните и изнемоштените лица како и лицата во затвор и домашен притвор.

На 15-ти јули, среда, ќе гласаат сите останати гласачи од избирачкиот список. За нив гласањето ќе започне во 7 часот а ќе заврши во 21 часот.