САД и Јужна Кореја напредуваат кон договор за елиминирање на царините

Јужна Кореја и САД работат на пакет договорот со кој ќе се отстранат американските и реципрочните царини пред да стапат на сила во јули, изјави јужнокорејска делегација по првата рунда трговски разговори во Вашингтон.

САД и Јужна Кореја вчера имаа „многу успешна“ средба, изјави американскиот министер за финансии, Скот Бесент, по состанокот.

- Се чини дека се движиме побрзо отколку што мислев и веќе следната недела ќе разговараме за техничките услови на договорот, изјави министерот пред новинарите.

Бесент и трговскиот претставник на САД, Џејмисон Грир, се сретнаа со министрите за финансии и индустрија на Јужна Кореја.

Ниту едната страна не откри детали за можните области на преговорите, но Јужна Кореја изјави дека побарала исклучоци од реципрочните и американските царини за одредени производи. Таа понуди соработка во бродоградбата и енергетиката и разговараше за трговските дисбаланси.

Корејскиот министер за индустрија Ан Дук-геун изјави дека целта е договорите да се постигнат до 8 јули, денот кога истекува одложувањето на царините што американскиот претседател Доналд Трамп ги воведе за речиси целиот свет.

Претседателот Трамп најави реципрочни царини од 25 проценти за Сеул, а Јужна Кореја е една од првите земји со кои американската влада започна трговски преговори.