Свет
22. April 2016 - 13:56

Русија демантира дека имало руски напади врз израелски авиони во Сирија

Портпаролот на Кремљ ги демантираше денеска објавите во медиумите дека рускиот претседател Владимир Путин и израелскиот премиер Бенјамин Нетанјаху разговарале за наводните инциденти меѓу руските сили во Сирија и израелските воени авиони.

- Не сакам да ги коментирам израелските весници. Во овој случај соопштенијата на израелските весници се далеку од вистината, изјави Дмитриј Песков.

Тој нагласи дека Путин и Нетанјаху разговарале за ситуацијата во Сирија и во регионот на Блискиот Исток, како и за трговско-економската соработка меѓу двете земји. Според него средбата била „мошне корисна и содржинска“.

Израелски весници објавија дека руските силите во Сирија најмалку два пати стрелале врз израелски воени авиони, што го принудило премиерот Нетанјаху да бара зајакната оперативна координација со Москва.