Романските готвачи најуспешни на „ГастроМак 2018“

Тимот на готвачите од Романија освои најмногу награди на Третиот меѓународен гастрономски натпревар-„ГастроМак Македонија 2018“, што заврши синоќа во Струмица.

Според шефот на романскиот тим, Сара Драгојлу, дури во третото учество на оваа манифестација успеале да го освојат престижното признание.

- Трета година по ред учествуваме на „ГастроМак 2018“ со свои тимови, но оваа година сме најсреќни затоа што освоивме толку многу награди, рече Драголју.

Додаде дека романската и македонската кујна се многу слични и дека со задоволство доаѓаат секогаш во Македонија.

Третото издание на на оваа кулинарска и гастрономска манифестација за затворено го прогласи претседателката на „ГастроМак 2018“, Адрија Алачки. Таа истакна дека секој од учесниците ќе понесат со себе залче од македонските традиционални вкусови и дека наредната година повторно ќе се соберат за да ги одмерат кулинарските вештини.

На градоначалникот на Струмица, Коста Јаневски, му беше врачено признание од страна на организаторите за помошта и поддршката што манифестацијата ги добива од страна на општината.

Во изминативе три дена тристотини учесници-натпреварувачи, над стотина врвни светски судии, мастерклас предавачи и почесни гости, од над триесетина земји од цел свет пред жири комисии ги презентираа своите кулинарски вештини во повеќе гастрономски дисциплини.