Реконструкција во училиштето во кривопаланечко Жидилово

Со средства во висина од 1.250.000 денари се гради потпорен ѕид и се уредува училишниот двор во подрачното училиште на основно општинско училиште „Јоаким Крчовски“ во Крива Паланка.

- Последните неколку години потпорната стена и оградата беа комплетно руинирани, а пристапните скали беа дотраени, што претставуваше лоша слика за училиштето но и за минувачите, бидејќи самата зграда е до магистралата која води кон Бугарија. Баравме средства од донатори, но не изнајдовме, по што издвоивме дел од заштедата од блок-дотациите на училишниот буџет, информираше  Драган Ристовски, директор на ООУ „Јоаким Крчовски“ во Крива Паланка.

Ѕидот е со вкупна должина од околу сто метри, а ќе се постави ограда од ковано железо и ќе се направат нови пристапни скали. Додаде дека изминатиот период е реконструирана целата училишна зграда со средства од повеќе извори, како и од Министерството за образование и наука.

- Изминатите 7-8 години постојано се вложуваше во обнова на ова училиште. Реконструирана е кровната конструкција, извршена е замена на столаријата со ПВЦ, запазена е енергетската ефикасност на објектот, а инсталирано е и парно-греење, со што се исфрлени старите шпорети на дрва, има поголема хигиена и се заштедува за молерисување, дополни Ристовски.

Подрачното основно општинско училиште во село Жидилово е изградено по Втората светска војна. Тоа е едно од вкупно осумте подрачни училишта на „Јоаким Крчовски“ каде се одвива настава од прво до деветто одделение.