Раца нов кошаркарски селектор на Македонија

Управниот одбор на Македонската кошаркарска федерација (МКФ) го назначи 55-годишниот српски тренер Драган Раца за нов селектор на кошаркарската репрезентација. Раца потпишал двегодишен договор до 2018 година , но втората година е условена со пласман на националниот тим на Евробаскетот во 2017 година.

 

Раца ќе ги води „црвено жолтите“ во квалификациите за Европскиот шампион во 2017 против селекциите на Луксембург, Унгарија и Велика Британија.

 

Раца својата тренерска кариера ја започнал во 2002 година на клупата на АЕЛ Лимасол од Кипар, потоа водел и екипи во првенствата на Либан и на Кина. Неговиот последен ангажман е во кинескиот Чунгкинг флај драгонс, претходно бил тренер и на Ираклис, Олимпиас Патра, Апоел, Сагаза (Либан) и кинески Гуангжоу.

 

Српскиот тренер, инаку, досега бил и селектор на репрезентациите на Либан (2007-2009) и Кипар (2004-2005). 

 

На стартот на тренерската кариера во 2002 година Раца е прогласен од страна на ФИБА за најдобар тренер почетник во Европа, а три години подоцна во 2005 година го добива и признанието најдобар тренер во клупските натпреварувања под капата на ФИБА. Во 2007 година како селектор ја водел селекцијата на Либан до сребрениот медал на Првенството на Азија.