Путин: Резултатите од референдумот го одразуваат незадоволството на Британците

Резултатите од референдумот во Велика Британија, на кој мнозинството гласачи се изјаснија за излез на земјата од ЕУ, го одразува незадоволството на граѓаните со безбедносната состојба и недостаток на желба да се им се помага на послабите европски економии, изјави денеска рускиот претседател Владимир Путин.

- Верувам дека на Британците им е јасно зошто се случи ова. Никој не сака да храни и субвенционира послаби економии, да помага други држави и цели народи, истакна Путин.

Според него, „граѓаните веројатно се незадоволни и од разрешување на проблемите во сферата на безбедноста, која драматично е влошена по миграцискиот бран“.

- Луѓето сакаат да бидат понезависни, додаде рускиот претседател.

Коментирајќи ја забелешката на британскиот премиер Дејвид Камерон дека Путин ќе ја поздрави одлуката за Брегзит, тој истакна дека Русија немала никакво влијание врз одлуката на Велика Британија да ја напушти ЕУ.