Прва пензионерско-музичка вечер во Делчево

Во Делчево синоќа прв пат се одржа пензионерско-музичка вечер. Настанот го организираше Здружението на пензионери,  а во рамки на културно-уметничката програма свој настап имаше новоформираната музичка група составена од пензионери кои долго време другаруваат со музиката.

– Ние сме новоформирано друштво, нема ни два месеци како постоиме. Успеавме за краток период да го конципираме вечерашниот настап и се надевам дека делумно успеавме во тоа. Присутните имаа можност да видат изведба на гајда, тамбура, ќемане како и вокални интерпретации кои доловија дел од македонското народно музичко творештво, информираше претставникот на групата Ѓорѓи Ѓорѓиевски.

Свој настап на пензионерско-музичката вечер имаше и Методија Илиев, пензионер кој 5 децении свири на ќемане.

– Другарувам со музиката од мали нозе. Свирам на ќемане и инструментот сам го изработувам. Повеќе 50 години се занимавам со музика и за мене тоа е мојата прва љубов, истакна Илиев.

Честитајќи им ги празниците на сите пензионери новоформираната музичка група за следната 2020 година најави голем број на настапи на сите пензионерски смотри на кои што ќе бидат поканети.