Промовирана „Персонална библиографија“ на професорот Душко Цацков

Во Штип денеска беше промовирана книгата „Персонална библиографија“ на Душко Цацков, поранешен универзитетски професор и декан на Педагошкиот факултет.

Издавањето на книгата и промоцијата се поддржани од Општината. Професорот кој полни 80 години, зад себе има оставено литература за деца, но и за наставници и за универзитетски професори. 

- Досега вакви библиографиии имаа само Балабанов, Ренџов, Чепреганов и јас. Сите мои школски другари, изјави Цацков, според кој, најважно е духовното богатство. 

Милена Ристова-Михајловска, директорката на НУУБ „Гоце Делчев“ каде што се одржа промоцијата, најави дека во петок ќе биде промовирана и библиографија за професорот д-р Методи Чепреганов. 

- Оваа година Советот на Општина Штип и градоначалникот Илчо Захариев поддржаа издавање на две библиографии. Нашата интенција е во јуни да аплицираме со проект до Министерството за култура за печатење второ издание на овие библиографии, бидејќи сегашниот тираж е мал, истакна Ристова-Михајловска.

Библиотекарите кои работеа на „Перосналната библиографија“ велат дека книгата е одлично четиво кое може да им послужи на студентите при нивното истражување.