Промоција на социјално претприемништво кај средношколците во Скопје

Во средните училишта на Град Скопје, денеска ќе почне обука по проектот „Младинско социјално претприемништво“. Целта е промоција на социјалното претприемништво кај средношколската младина како и развој на вештини и интерес за развој на социјални претпријатија кај учениците од четврта година во стручните училишта на територијата на Град Скопје.

Проектот е финансиран од Градот Скопје, Сектор за меѓународна соработка и соработка и поддршка на здруженија на граѓани и фондации во рамките на реализација на активности дефинирани со Стратегијата на Град Скопје за соработка и поддршка на здруженија и фондации за период 2014-2017 година, а логистички е поддржан од Компанијата „Плимонт“ Скопје.

Носител на проектот е Асоцијација за унапредување на статусот на жената во современите општествени процеси во Република Македонија “Женска акција” која се залага за унапредување и заштитување на македонските традиции. Развивање на солидарност за заштита на човековите права и слободи, отфрлање на насилството, комуникација, соработка и солидарност, како и почитување на ненасилните методи како единствен услов за заштита на слободата, остварување на правдата и постигнување на демократска, економска и социјална благосостојба за сите подеднакво.

Развојот на социјалното претприемништво (СП) во Македонија треба да придонесе да се зајакне солидарноста во општеството и интеграцијата на различни маргинализрани групи, да се зајакне општеството со иновативни решенија на социјалните, економските и еколошките проблеми, како и ќе се обезбеди дополнителен придонес кон социјалната сигурност на граѓаните како категарија дефинирана во Уставот на РМ.