Привремен застој на граничниот премин Прешево поради дефект на електронската опрема

На српскиот граничен премин Прешево со Северна Македонија, по нестанок на електричната енергија, дојде до дефект на комуникациската опрема, што предизвика застој во сообраќајот, објавија денеска во Царинската управа на Србија.

– Околу 4.45 часот, имаше прекин на струја и прекин на сите комуникации, по што се формира колона од камиони во должина од два километри и на излезот и на влезот на Србија со Северна Македонија.

Во патничкиот сообраќај немаше проблем или задржување.

– Со брза интервенција остранет е дефектот и воспоставени се комуникациските системи, со што сообраќајот полека почнува да се нормализира – соопштија од Царинската управа.

Сега се во функција сите комуникациски системи, а царинските службеници се обидуваат што е можно поскоро да ја расчистат колоната на камиони кои, поради оваа вонредна околност, се формира на влезот и на излезот на Србија.

Се очекува за неколку часа ситуацијата на преминот Прешево да биде целосно нормализирана за камионски сообраќај. Патничкиот сообраќај се одвива без никакви проблеми.Привремен застој на граничниот премин Прешево поради дефект на електронската опрема