Прилеп доби прифатилиште за бездомни кучиња

Прилеп за прв пат, официјално, отвори прифатилиште за кучиња. Прифатилиштето е стационирано кај терминалот на Јавното претпријатие „Комуналец“.

Според Ѕвонко Јованоски, директор на прилепски „Комуналец“, претпријатието неодамна доби дозвола за отворањето и работата на стационарот, што е со капацитет за прифаќање на преку 40 бездомни кучиња. Веќе се сместени 30-ина.

-Прилеп за прв пат отвори прифатилиште за бездомните кучиња и се вброи во еден од неколкуте градови во земјава. Ја добивме дозволата и веднаш почнавме со активна работа. Во стационарот веќе се прифатени 30-ина бездомни кучиња и имаат целосен третман: преглед, вакцинација и прочистување. За ефективно функционирање на прифатилиштето се ангажирани пет лица, двајца се професионални заловувачи, еден ветеринарен лекар и еден ветеринарен техничар и имаме лице кое се грижи за хранењето на кучињата, објаснува Јованоски.

Според Законот, кучињата во прифатилиштето можат да бидат еден месец. За вдомување веќе има заинтересирани лица.

-Се појавија заинтересирани лица кои сакаат да вдомат кучиња. Законски ние можеме да ги чуваме еден месец. Доколку за некои не се јави никој, тие мора да се вратат на местото каде се заловени, но веќе имаат целосен медицински третман, вели Јованоски.

Според Јованоски, во текот на годината, во Прилеп немало многу инциденти со кучиња-бездомници, но ќе се реагира при секоја пријава.