Претставничкиот дом на САД усвои резолуција за прекин на воените дејствија против Иран

Претставничкиот дом на Конгресот на САД усвои резолуција со која се бара прекин на воените дејствија против Иран без претходно одобрение од Конгресот.

Резолуцијата, предводена од демократите, беше усвоена со 215 гласови „за“ и 208 „против“, а ја поддржаа и четворица републикански конгресмени.

Иако гласањето претставува „политички удар“ за претседателот Доналд Трамп, мерката засега има симболично значење, бидејќи за да стапи во сила, резолуцијата би морал да ја усвои и Сенатот, а за надминување на очекуваното претседателско вето би било потребно двотретинско мнозинство во двата дома на Конгресот.

Гласањето следуваше по три претходни неуспешни обиди за усвојување слични резолуции во Претставничкиот дом, при што разликата меѓу поддржувачите и противниците стануваше сè помала.

Сенатот минатиот месец, по седум неуспешни обиди, во процедурално гласање усвои посебна, но содржински слична резолуција за воените овластувања. 

МИА