Преполовен бројот на барателите на азил во ЕУ

Бројот на лицата кои во 2017 година побарале меѓународна заштита во Европа е намален за речиси 50 отсто во однос на претходната година, соопшти денеска Европската канцеларија за поддршка на азил (ЕАСО).

Канцеларијата прецизира дека повеќето од барателите на азил биле Сиријци.

ЕАСО информира дека лани 706.913 лица побарале азил во 28-те земји од Европската Унија плус Норвешка и Швајцарија, што претставува 43 проценти помалку отколку во 2016 година.

Ова е втора година по ред во која бројката опаѓа, откако во 2015 година во Европа пристигнаа над еден милион луѓе, претежно сириски бегалци.

Повеќе од 98.000 Сиријци аплицирале за азил, а над 40.000 барања биле поднесени од државјани на Ирак, Авганистан и Нигерија.

ЕАСо соопшти дека биле одобрени околу 40 проценти од сите барања за азил во 2017 година.