Предлозите на ЕС за избегнување на Брекзит се солидна база за преговори, според Оланд и Камерон

Британскиот премиер Дејвид Камерон и францускиот претседател Франсоа Оланд сметаат дека предлозите на Европскиот совет, кои имаат цел да се избегне излегувањето на Велика Британија од Европската унија, претставуваат солидна база за преговори, изјави портпаролот на Камерон во Лондон, по ненадејната посета на британскиот премиер во Париз на разговори со Оланд.

Тој нагласи дека двајцата лидери се согласуваат дека добро се напредува по прашањето за предоговарање на членството на Велика Британија во ЕУ и оти спогодбата претставена од Европскиот совет е солидна база за постигнување на спогодба на самитот оваа недела.

Претставник на кабинетот на Оланд по средбата изјави дека Франција сака спогодба за избегнување на Брекзит, но смета дека има да се завршат уште многу работи, особено во однос на економското управување со ЕУ.