Пожарот кај Радовиш се уште активен

Пожарот на планината Готен, меѓу селата Покрајчево и Злеово во општина Радовиш, се уште е активен и се шири и покрај напорите да биде изгаснат во изминатите десет дена.

Според известувањето од Регионалниот кризен штаб во Радовиш продолжуваат оперативните мерки за негово гаснење, но ситуацијата на теренот е многу сложена поради непристапниот терен.

-За денешниот ден ангажирани се 75 лица, од кои 45 од ЈП „Национални шуми“-подружница „Плачковица“-Радовиш, по пет лица од подружниците од Струмица, Штип и Кочани, и 15 пожарникари од ТППЕ Радовиш, Берово и Струмица. Од материјалните средства ангажирани се еден трактор од ЈП „Национални шуми“-подружница „Плачковица“- Радовиш и еден од ЈП „Плаваја“ за дотур на вода, информираа од Регионалниот кризен штаб.

Претпладнето во гаснењето на пожарот се вклучија и авионите на Дирекцијата за заштита и спасување, а се очекува тие да продолжат со гаснење и до крајот на денот.

Досега во пожарот изгореа стотина хектари нискостеблеста шума, а постои опасност да се прошири и во високостеблестата шума на планината Готен.