Потона товарен брод со 14 членови на екипажот во близина на грчкиот остров Лезбос

Товарен брод со 14 членови на екипажот потона утрово во морскиот дел југозападно од грчкиот остров Лезбос и во тек е спасувачка акција на Крајбрежната служба на Грција, а неофицијално спасен е еден морнар, јави дописничката на МИА од Атина.

Во акцијата учествуваат два хеликоптери, бродови на Крајбрежната служба, бродови што се во близина, како и една фрегата на воената морнарица на Грција. 

Според првичните информации, бродот што пловел под знамето на Комори, пренесувал сол и тргнал од Египет со крајна дестинација Истанбул, а потонал од засега непознати причини. 

Членовите на екипажот се државјани на Египет, Сирија и Индија и се водат за исчезнати.