Пороен дожд во Демир Хисар и на планинските предели меѓу Гостивар и Кичево

Управата за хидрометеролошки работи попладнево соопшти дека пороен дожд има на планините меѓу Гостивар и Кичево, а претходно невреме со пороен дожд и грмежи го зафатило и подрачјето околу Демир Хисар.

Во западните делови од државата попладнево преовладува променливо облачно време со повремен локален дожд, претежно во планинските подрачја.

До крајот на денот во источните делови се очекува времето да биде претежно ведро, а во западните делови да преовладува променливо облачно време со повремени врнежи од дожд, на места со пороен дожд и грмежи. Услови за дожд и грмежи ќе има и во југоисточните делови. 

За утре УХРМ најавува променливо облачно време со сончеви периоди. Во јужните делови на места ќе биде нестабилно со пороен дожд и грмежи и ќе дува слаб до умерен ветер од југоисточен правец. Поради спуштање на постудена воздушна маса, позначителна нестабилност се очекува кон крајот на денот кон сабота. Минималната температура ќе се движи од 12 до 20 степени, а максималната од 24 до 30 степени. УВ индексот ќе изнесува 7.