Помош од општина Ресен за настраданите во поплавите во Скопско

Вработени од Јавното комунално претпријатие „Пролетер“, Територијалната противпожарна единица – Ресен и од општина Ресен втор ден помагаат во расчистување на загрозените подрачја од невремето што неодамна го зафати скопскиот регион.

Ресенските екипи работат на расчистување кал и оштетена покуќнина во домови кои настрадаа од големите поплави. Локалната самоуправа најави дека за утре е планирана нова група од 20-тина вработени во општината да заминат во загрозените подрачја на расчистување од последиците кои ги направи невремето.

Во општинската зграда и на градскиот плоштад во Ресен отворени се пунктови на Црвениот крст за собирање донации од вода, храна и средства за хигиена. Компании од Преспа донации испраќаат и директно во собирниот центар на Црвениот крст во Момин Поток.

Советот на општина Ресен на вонредна седница донесе одлука за донирање 100.000 денари, а сите советниците решија да се откажат од дел од месечниот надомест и да го уплатат во наменскиот Фонд за загрозеното население.

Граѓаните и правните субјекти може да донираат за поплавените во Скопско на жиро-сметка на Фонд на солидарност 300000001327966 ДБ 4030984271620 – Комерцијална банка или по 100 денари со вртење на телефонскиот број 143 400 од сите мобилни оператори.