Почнува новата сезона во ракометното првенство на Македонија

Новата сезона во најквалитетната машка ракометна лига во Македонија ќе стартува вечерва со натпреварот меѓу Работнички и Охрид. Дуелот се игра во Спортскиот Центар „Форца“, а почетокот е во 20 часот. Двата тима во рамките на преодниот рок направија голем број промени во своите состави. Во редовите на Работнички нови играчи станаа македонските репрезентативци браќата Маркоски, Златко Мојсоски, Мите Стоилов, како и двајца играчи од Србија. Охридскиот лигаш своите редови ги засили со четири играчи од странство.

 

Покрај овој дуел од 1.коло утре се игра натпреварот: Прилеп 2010 – Пелистер, додека во недела на програмата се натпреварите: ГРК Борец – Металург 2 и Пролет 62 – Радовиш. Колото ќе биде комплетирано во среда со натпреварот Вардар Јуниор – Металург, поради настапот на тимот од Автокоманда во Лигата на шампионите.

 

Екипите на Вардар и Макс Струмица поради играњето во СЕХА лигата ќе се вклучат во плеј офот и нема да играат натпревари од Супер лигата.

Инаку, ракометарите на македонскиот првак Вардар во недела во Лигата на шампионите гостуваат кај Монпеље во Франција, а Металург гостува кај Мотор во Украина.