Почна судењето на обвинетите за смртта на Марадона

Судскиот процес против седумчлениот лекарски тим кои се обвинети за смртта на еден од најдобрите светски фудбалери на сите времиња Диего Армандо Марадона почна денеска во Аргентина.

Процесот во судот во предградие на главниот град Буенос Аирес во кој медицински сестри, неврохирург и психијатар се обвинети за убиство од небрежност ќе трае неколку месеци.

Марадона почина во својот дом во ноември 2020 година од срцева слабост на 60-годишна возраст додека се опоравуваше од операцијата за отстранување на згрутчување на крвта неколку дена претходно.

Неговиот медицински тим ги отфрла наводите за „убиство со умисла“ во лекарскиот третман на поранешниот играч на Бока Јуниорс и Наполи.

Доколку бидат прогласени за виновни, тие би можеле да добијат затворски казни од осум до 25 години.

Пред тричлениот суд се очекува да бидат презентирани повеќе од 100 искази на сведоци, од членови на семејството и лекари до пријатели и новинари.

Во 2021 година, истражителите го класифицираа случајот како убиство од небрежност, утврдувајќи дека обвинетите биле свесни за сериозноста на здравствената состојба на Марадона и не ги преземале потребните мерки за да го спасат.

„Има повеќе од доволно елементи за да се докаже дека Диего не бил третиран како што треба“, рече Марио Бодри, адвокат на еден од синовите на Марадона, кој заедно со другите членови на семејството им го претстави случајот на новинарите.

Меѓу обвинетите на кои им се суди се психијатарот Агустина Косачов, неврохирургот Леополдо Луке, психологот Карлос Анхел Дијаз, докторката Ненси Едит Форлини, медицинската сестра Рикардо Алмирон, главната медицинска сестра Мариано Ариел Перони и клиничкиот лекар Педро Пабло ди Спања.

На осмиот обвинет, медицинската сестра Дахиана Мадрид, ќе ѝ се суди одвоено во јули, објавија локалните медиуми.