ОН побара од Турција да ја почитува слободата на говорот

Генералниот секретар на ОН, Бан Ки-мун побара од Турција да ја почитува слободата на говорот, откако Владата презеде контрола врз најпродаваниот опозициски весник во земјата „Земан“, познат по критиките кон владејачката партија.

Турските власти ја презедоа контролата врз весникот во петокот како мерка против приврзаниците на муслиманскиот проповедник Фетулах Ѓулен, кој се наоѓа во САД и е најголем непријател на турскиот претседател Реџеп Тајип Ердоган.

- Бан Ки-мун го следи внимателно развојот на ситуацијата во Турција, изјави портпаролот на генералниот секретар, Фархан Хак.

Генералниот секретар на светската организација бара од турските власти да ја почитуваат слободата на говорот и на собири, бидејќи смета дека демократијата и социјалниот развој зависат од постоењето на различни мислења, дури и кога тие се критички.