Папата Лав Четиринаесети го прими Синер

Папата Лав Четиринаесетти го прими светскиот тенисер број еден, Италијанецот Јаник Синер, кој неделава се натпреварува на турнирот од серијата Мастерс 1000 во Рим, објави денеска Канцеларијата за односи со јавноста на Ватикан.

„Страста на Папата кон тенисот е добро позната“, наведе Прес-службата на Ватикан, додавајќи дека Синер бил придружуван од членови на неговото семејство, а на средбата присуствувал и претседателот на италијанската тениска Федерација, Анџело Бинаги.

Новиот папа, кој е на 69 годишна возраст и самиот е тенисер. Според италијанскиот спортски весник „Ла Газета дело Спорт“, тој има „одличен бекхенд и е сериозен натпреварувач“.

Во интервју еден ден откако стана кардинал во 2023 година, на веб-страницата на августинците, монашката заедница на која припаѓа, Лав Четиринаесетти рече: Се сметам за аматерски тенисер. Откако го напуштив Перу, имав малку можности да играм, но едвај чекам да се вратам на теренот.“

Пред неколку дена, папата Лав Четиринаесетти на средба со новинари беше запрашан за негово можно учество на хуманитарен тениски турнир, на кој би настапил и легендарниот американски тенисер Андре Агаси.

„Само немојте да го повикате Синер“, одговори на шега папата, алудирајќи на доминацијата на Италијанецот на АТП листата, како и на значењето на неговото презиме на англиски јазик (грешник).

Синер од минатата сезона е тенисер број еден во светот, освојувајќи досега во кариерата осум титули, вклучувајќи и титули на Австралија Опен, Ју Ес Опен и финалето на АТП во Торино, како и Дејвис Купот со Италија две години по ред.