Осум контејнери опожарени во текот на минатата ноќ

 

Два новопоставени контејнера со зафатнина од 3,2 кубни метра се опожарени во текот на изминатата ноќ на главната улица во населбата Ѓорче Петров, како и шест пластични контејнери од 1,1 кубни метри во населбата Ново Лисиче, информира  ЈП „Комунална хигиена“-Скопје.

 

Оттаму посочуваат дека со ваков инцидент се соочиле и за време на изминатиот викенд во скопската населба Радишани, каде изгореа три контејнери од 1,1 кубни метри и еден специјален контејнер-ѕвоно, наменет за селекција на стакло.

 

-Опожарените садови се целосно уништени и неупотребливи. Веќе имавме случај на еден опожарен нов контејнер на улицата „Рузвелтова“, а во текот на минатата ноќ изгореа уште два нови и шест од старите садови за одлагање на отпадот. Покрај значителната финансиска штета што е нанесена на ЈП „Комунална хигиена“-Скопје, овие инциденти предизвикуваат големи проблеми при одлагањето, собирањето и транспортот на комуналниот отпад. Апелираме да престане вандализмот и уништувањето на контејнерите, за екипите на Претпријатието да можат навремено да ги извршуваат своите работни обврски на терен, изјави директорот на ЈП „Комунална хигиена“-Скопје, Абдусамед Шабани.

 

Сите случаи на опожарување на садовите за одлагање на отпадот се пријавени до надлежните органи и ќе бидат преземени соодветни мерки за да се пронајдат и санкционираат сторителите.