Осомничениот за нападите со нож во Канада во кои беа убиени 10 лица почина откако беше приведен

И вториот осомничен за неодамнешното масовно убиство со нож во канадската провинција Саска чеван почина откако беше уапсен од полицијата. Триесет и двегодишниот Мајлс Сандерсон имал тешки повреди кои си ги нанел самиот себеси додека се обидувал да избега од полицијата. Бил лоциран откако украл автомобил од приватен имот. Во возилото што го користел бил пронајден нож. Откако бил приведен, тој е превезен во болница, каде што бил прогласен за мртов. Во нивниот напад беа убиени 10 лица, а 19 беа повредени.

Белоруската војска започна големи воени вежби долж полската граница, во главниот град Минск и североисточниот регион Витебск, соопшти утринава белоруското Министерство за одбрана. Воената вежба ќе трае една недела, а војниците ќе вежбаат ослободување на територијата привремено окупирана од непријателот и воспоставување на контрола над пограничните региони. Во меѓувреме Украина стационираше армија и воспостави одбранбени позиции долж границата со Белорусија поради новите сигнали дека нејзиниот северен сосед би можел да се приклучи на руската војска која веќе окупира одредени делови на Украина.

16 милиони жители од кинески град Ченгду остануваат во карантин воведен на први септември поради ширењето на корона вирусот. Главниот град на провинцијата Сечуан кој неодамна се соочи со топлотен бран, прекин на електричната енергија и земјотрес, беше затворен откако беа откриени над 100 нови случаи на ковид-19 два дена по ред.  Карантинот требаше да биде укинат вчера, но властите доцна попладнето соопштија дека вирусот се уште претставува ризик во некои делови од градот. Од над 21 милиони жители на Ченгду, 16 милиони се во карантин и ќе треба да се тестираат секој ден. Во областите со висок ризик во градот на жителите не им е дозволено да ги напуштаат своите домови.