Општините за новогодишното украсување потрошиле 30 проценти повеќе од лани

Локалните власти за новогодишното украсување за дочекот на 2019 година потрошиле околу 615 илјади евра, што е за 30 проценти повеќе од претходната година, покажува анализата направена од Центарот за граѓански комуникации.

Според податоците од анализата, најголем дел од парите завршиле кај скопската фирма „Линк Медиа Плус“, што за два склучени договори со Град Скопје и со Општина Струмица добила над 300 илјади евра, а најмногу договори, вкупно 11 во вкупна вредност од 185 илјади евра, биле склучени со фирмата „Метал-Вет-Ел“ од Скопје. Договори со „Метал-Вет-Ел“ склучиле скопската Општина Аеродром, Охрид, Куманово, Чаир, Радовиш и Гевгелија.

Базата на податоци дава преглед на трошоците за новогодишно украсување во период од четири години и овозможува споредба дали одредена општина го зголемила или намалила овој трошок. Базата на податоци е дел од предвидените десет истражувања и бази на податоци за трошењето на јавните пари кои ќе се реализираат во рамки на проектот „Јавно трошење за јавно добро“, поддржан од Проектот на УСАИД за граѓанско учество. Целта е да се зголеми ефективноста на јавното трошење преку намалување на корупцијата и зголемување на транспарентноста.