Одложено сослушувањето на каталонските сепаратистички лидери

Шпанскиот Врховен суд го одложи за 9 ноември сослушувањето на поранешните членови на распуштениот каталонски парламент на барање на нивните адвокати. 

Меѓу членовите на таа група е и сменетата претседателка на парламентот, Карме Форкадељ. Претходно, членови на сменетата каталонска влада и пратеници почнаа да пристигнуваат во суд во Мадрид каде денеска требаше да се соочат со евентуални обвиненија за бунт поради прогласувањето независност на Каталонија.

Вкупно 20 регионални политичари, меѓу нив и разрешениот каталонски лидер Карлес Пуџдемон се повикани да се јават пред суд. Во прашање се 13 членови на сменетиот каталонски кабинет и шест членови на парламентарен одбор.

Прв пред судот се појави каталонскиот потпретседател на Владата Ориол Жункерас. Врховниот шпански суд го повика Пуџдемон и 13 негови сменети министри да се појават пред судии денеска и утре, најавувајќи обвиненија против нив. Пуџдемон ќе соработува со шпанските и белгиски власти иако денеска не се појави пред шпански судии, изјави адвокатот на сменетиот каталонски лидер.

- Атмосферата не е добра, подобро е да се дистанцираме. Ако побараат, тој ќе соработува со шпанските и белгиски судови, изјави адвокатот Пол Бекерт.