Обилни снежни врнежи го парализираа воздушниот сообраќај во Северна Европа

Обилните снежни врнежи денеска предизвикаа големи проблеми во сообраќајот во Велика Британија, а многу летови беа откажани и во Германија и Холандија.

На аеродромите во Мадрид и Барселона, исто така, имаше доцнења на летови, од кои некои доцнеа и по 3,5 часа.

Неколку германски аеродроми денеска одложија летови поради снежни врнежи и замрзнат дожд. Во Франкфурт, најголемиот германски аеродром, беа откажани 120 полетувања и слетувања од планираните 1090 за денеска. Лошата видливост дополнително го отежнува воздушниот сообраќај.

Во Минхен синоќа, од претпазливост, беа откажани 35 летови од вкупно 750 планирани.

Во Англија и Велс, во текот на ноќта меѓу сабота и недела, паднаа неколку сантиметри снег, а во западен Јоркшир (северна Англија) утрово снежната покривка изнесуваше 12 сантиметри. Во некои региони над 300 метри надморска височина беа измерени и до 40 сантиметри снег.

Аеродромот Манчестер утрово повторно ги отвори своите писти, но доцнењата продолжуваат поради одмрзнување на авионите и чистење на пистите. Слична ситуација е и во Ливерпул.

Во аеродромот Схипхол во Амстердам, беа откажани 68 летови, а повеќе од 200 беа одложени.

Во Норвешка се предвидуваат обилни снежни врнежи на југоистокот, додека во Шведска е издаден портокалов и жолт аларм поради студеното време, а возовите на северот на земјата беа откажани.