Протестни собири на ВМРО-ДПМНЕ во неколку градови

Пред седиштето на Општинскиот комитет на ВМРО-ДПМНЕ во Охрид синоќа се собраа членови и симпатизери да го изразат својот револт, од како што велат, непринципиелната политика на СДСМ и опасноста од редефинирање на државата.

Претседателот на ОК ВМРО-ДПМНЕ Охрид Љубен Арнаудов, рече дека нема да дозволат двојазичност, разнебитување, федерализација и други тајни работи кои ги прави СДСМ и партиите на Албанците.

- Ние тука го креваме гласот и кажуваме дека постоиме, враќање нема ние ќе застанеме на браникот на татковината. Упатуваме апел до сите граѓани да се освестат бидејќи се работи за постоењето на Македонија, изјави Арнаудов.

Од ОК ВМРО-ДПМНЕ Охрид најавија дека ќе го мобилизира целото свое членство, а протестите ќе продолжат и ќе бидат помасовни, како и дека нема да дозволат да бидат загрозени интересите на државата и на македонскиот народ.

Слични собири вечерва се одржаа и во Битола, Ресен, Велес, Струга, Кавадарци, Прилеп, Куманово, Скопје и други градови.