Лажна пријава за бомба во траект со 958 лица на атинското пристаниште Пиреас

По истрагата и проверките што ги спроведоа припадниците на Крајбрежната служба на Грција, со помош на куче за откривање експлозивни направи, не беше пронајден ништо сомнително. Проверките следуваа откако попладнево беше пријавено дека на траектот „Blue Star 1“, закотвен во атинското пристаниште Пиреја, е поставена бомба. На бродот имало 875 патници и 83 членови на екипажот, пренесе дописничката на МИА од Атина.

Од грчката Крајбрежна служба информираа дека за време на проверките сите патници биле евакуирани. Траектот требало да исплови од Атина кон островите Сирос, Патмос, Лерос, Кос и Родос.

Освен патниците и членовите на екипажот, на бродот имало и 89 автомобили, 12 мотоцикли, 110 товарни возила и еден минибус. По завршувањето на проверката, се очекува траектот да добие дозвола за испловување.

Според грчките медиуми, пријавата била упатена од непознато лице до еден од патниците, со предупредување дека на бродот е поставена бомба која ќе експлодира.

Лажна дојава за бомба имаше и минатата недела, кога беше пријавено дека е поставен експлозивен механизам на крузерот „Crown Iris“. На бродот имало 940 патници и 597 членови на екипажот, а од грчкиот остров Сирос требало да отплови кон Хаифа, Израел.