Центарот за детска заштита Кичево апелира до корисниците за обнова на документацијата

Во Центарот за детска заштита Кичево исплатата на детски додаток, родителски додаток, како и додатокот за деца со посебни потреби се извршува редовно и без задоцнување, информира  координаторот на Центарот Садик Емроја. Тој упати апел до сите корисници на парични средства, што поскоро да извршат обнова на документацијата за да им биде овозможено правото на користење на овие средства за 2017 година.

- Доколку до 12 јануари корисниците не успеат навреме да ја обноват документацијата ќе го изгубат правото за користење на парични средства за 2017 година, истакна Емроја.

Во овој центар родителски додаток користат околу 460 корисници, бројка која, како што велат оттаму, бележи тренд на зголемување. Инаку, паричниот надоместок за оваа категорија е во износ од 8.362 денари.

Додаток за четврти родено дете земаат 20 корисници, во износ од 11.706 денари месечно. Ова право го користат само оние деца кои се родени до март 2010 година, по што со закон ова право е укинато.

Исто така, преку Центарот паричен надоместок земаат и децата со посебни потереби, вкупно 182, а средствата кои ги добиваат месечно се во износ од по 5.017 денари.