Награда за Давид Тодосовски на Филмскиот фестивал во Мостар

Главниот актер во филмот „Ослободување на Скопје” Давид Тодосовски ја доби наградата за најдобар дебитант на штотуку завршениот Филмски фестивал во Мостар, соопшти Партизанс продукција. 

Според образложението на жирито, наградата на Тодосовски му се доделува за „уверливоста на толкувањето на ликот кој содржи многу тешки актерски техники, кој како дете-натуршчик многу успешно ги искажал”.

На режисерот на филмот Раде Шербеџија му е доделено специјално признание за „креацијата која го премостува времето и служи за зачувување на сеќавањата на едно извонредно уметничко дело од сферата на театарот кое сега во филмски облик е зачувано од заборавот”.

Филмот „Ослободување на Скопје” досега учествуваше на фестивалите во Хелсинки, Пула, Битола, Братислава, Загреб, а му престојат учества на Фест во Белград, Палм Спрингс, Монтевидео, Подгорица....