Мартин Шулц: Апсењата на прокурдски пратеници во Турција ја оддалечуваат Анкара од демократијата и ЕУ

Притворот во Турција на Селахатин Дермиташ, копретседател на прокурдската Демократска партија на народите (ДПН), и неговите соработници ја оддалечува Анкара од демократијата и Европската унија, изјави денеска претседателот на Европскиот парламент Мартин Шулц.

- Со најновите апсења на високи лица, турските власти не само што ја оддалечуваат Турција од демократијата, но свртуваат грб на вредностите, принципите, нормите и правилата кои ги поддржуваат односите меѓу ЕУ и Турција, изјави Шулц, истакнувајќи дека оваа ситуација треба итно да биде  решена.

Изминатата ноќ, турската полиција уапси 11 пратеници од Демократската партија на народите (ДПН), меѓу кои копретседателите на партијата ФигелЈукседаг и Селахатин Дермиташ, потсетува ТАСС.

На почетокот на јуни, турскиот претседател Реџеп Ердоган ратификуваше закон со кој се овозможува да бидат лишени од имунитет околу 150 пратеници. Меѓу нив се и членови на Демократската партија на народите, осомничени за помош на Курдската работничка партија (ПКК) и пропаганда во корист на оваа организација.