Реконструкција на Занаетчискиот дом во Куманово

 

Како што изјави раководителот на Центарот Младен Протиќ, се чека на потпишување договор со фирма - изведувач од Прилеп која треба да достави банкарска гаранција.

 

Реконструкцијата ќе ги опфати трите ката на објектот или околу 640 квадратни метри, а се очекува да заврши до ноември годинава.

 

За проектот, Центарот за развој минатата година аплицираше со проект до Бирото за рамномерен регионален развој и Министерството за локална самоуправа. Проектот е одобрен и се одвоени 200.000 евра, а општина Куманово со одлука на Советот, учествува со 100.000 евра за реконструкција на Занаетчискиот дом.

 

Занаетчискиот дом е споменик на културата поради што надзор на реконструкцијата ќе прави Конзерваторскиот центар од Скопје.

 

Домот, и покрај санацијата, ќе ја задржи почетната намена - услужни дејности и репрезентација. На првиот кат, објасни Протиќ, е предвидено да има фоаје, свечена сала, тераса, складишен простор, тоалети, на вториот галерија со 123 седишта и други простории, а на третиот - пет одделни простории. Во Домот ќе се оддржуваат промоции, изложби, симпизуми, предавања, семинари и слчни манифестации.

 

Последен пат галеријата во објектот е реконструрана во 1983 година.

 

Објектот по кој е препознатливо Куманово, е дело на рускиот архитект Владимир Антонов и е граден по иницијатива на занаетчиите од Куманово, а е пуштен во употреба 1930 година. Во текот на годините во него биле сместени неколку институции - народен магазин, општински синдикален сојуз, локален весник и радио, кино Напредок, Одделението на Архивот на Македонија, различни трговски објекти и занатечии.