Керн: И по брегзит приоритет е приближување на Балканот кон ЕУ

Приближувањето на држави од Западен Балкан во Европската унија останува приоритет и покрај брегзит, истакна синоќа австрискиот канцелар Кристијан Керн на Самитот за Западен Балкан во Париз.

Тој во изјава за австриски медиуми, нагласи дека е важно проширувањето на ЕУ кон Балкан како приоритет и поради фактот дека поддршката за Унијата во тој регион е поголема отколку во одделни членки на ЕУ.

Керн рече дека е неопходна стабилност на Западен Балкан и безбедноста не е прашање само на полициски мерки туку на развој и благосостојба.

Тој наведе дека веќе четири години стагнира нивото на плати како и БДП по глава на жител на Западен Балкан, што оцени дека тоа не е добар знак.

– Тој простор е исклучително важен за нас, нагласи Керн.

Укажа дека Западен Балкан е делумно под влијание на „исламистички групи“, делумно под влијание на Русија, а ЕУ има интерес за стабилност во регионот.

– Потребна е испружена рака од страна на ЕУ, наведе Керн додавајќи дека секоја држава од регионот треба да обезбеди владеење на правото.