Кери: Создавањето кинеска воздушна одбрана во Јужното Кинеско Море е провокативен чин

Американскиот државен секретар Џон Кери денеска во Улан Батор изјави дека евентуалното создавање на кинеска зона на воздушна одбрана во Јужното Кинеско Море, САД ќе го сметаат за провокативен и дестабилизирачки чин. 

- Воведувањето на таква зона над делови од Јужното Кинеско Море ќе го сметаме за провокативен и дестабилизирачки чин, кој автоматски ќе ги зголеми тензиите и ќе ја доведе во прашање определбата на Кина за решавање на територијалните спорови по дипломатски пат, изјави Кери, кој престојува во посета на Монголија.

Тој воедно ја повика Кина да „не презема еднострани акции на провокативен начин“. 

Говорејќи за неговата земја домаќин, Кери нагласи дека Монголија денес претставува „оаза на демократијата“ во деликатно опкружување со проблематични соседи, како Русија и Кина, што аналитичарите го оценија како обид на САД да обезбеди свој партнер во Улан Батор во услови на се поагресивните политики на Москва и Пекинг.

Кери доптаува во Улан Батор на пат од Париз за Пекинг, каде ќе се одржи осмиот годишен стратешки дијалог меѓу САД и Кина.