Кога не игра Македонија бележи прогрес на ФИФА листата

Прогрес од две места бележи македонската фудбалска репрезентација на најновата ранг-листа на ФИФА, на која сега „црвено-жолтите„ се на 103.место.

 

Интересно и овој пат напредокот на македонскиот национален тим доаѓа во период во кој репрезентацијата не одигра ниту еден натпревар, а ги задржа постоечките 311 бодови.

 

 Ова се должи на фактот што Бенин и Салвадор, кои загубија бодови поради своите слаби резултати во изминатиот месец, паднаа под Македонија.

 

 Следни противници на македонскиот национален тим се Луксембург (5 септември) и Шпанија (8 септември).

 

 Аргентина  ја задржа водечката позиција на најновата ФИФА ранг-листа, пред Белгија, која го мина актуелниот светски првак Германија.  Зад Германците се наоѓаат Колумбија, Бразил и Португалија, а најголем пад од водечките селекции бележи Холандија, која од петтата падна на 12. позиција.