Обама ја повика Британија да остане блиска со европските сојузници

Американскиот претседател Барак Обама ја повика велика Британија да остане блиска со своите сојузници во Европа за да помогне во меѓународната борба против тероризмот.

Тој коментар го даде во напис во Дејли телеграф објавен по неговото доаѓање синоќа во официјална посета на Лондон.

Обама наведува дека соработката со размена на разузнавачки податоци и борбата против тероризмот, па се до склучување договори за создавање работни места и економски раст, е многу подобра ако се остварува ширум Европа.

– Сега е време за пријателите и сојузниците да се држат заедно, потенцира Обама.

Тој вели дека ЕУ не го намалува британското влијание туку го зголемува.

– Силна Европа не е закана за глобалното лидерство на Британија, таа го зголемува водството на Британија во светот, наведува Обама.