Во Министерството за транспорт се одржа стручна јавна расправа за измените на Правилникот за урбанистичко планирање

Во Министерството за транспорт денеска се одржа стручна јавна расправа за предложените измени и дополнувања на Правилникот за урбанистичко планирање, чија цел е да го поттикнат развојот на туризмот, енергетскиот и здравствениот сектор, преку создавање услови за нови инвестиции, за поефикасно планирање и искористување на просторот.

Измените на Правилникот за урбанистичко планирање опфаќаат и можност за урбанизација на објекти од областа на терцијарното здравство, како и изградба на батериски системи, кои се од суштинско значење за развојот на енергетскиот сектор.

-Имајќи предвид дека туристичкиот сектор веќе бележи позитивни трендови, преку предложените измени се предвидува можност за стимулирање изградба на големи хотелски комплекси вон градови, исто така и надвор од заштитени подрачја, надвор од национални паркови, надвор од заштитената зона на Охридскиот регион поврзана со заштитата од УНЕСКО, со што директно се поддржува растот на туризмот и привлекувањето нови туристи во државата, а дополнително се придонесува за отворање нови работни места. За да се обезбеди целосна транспаретност и вклученост на јавноста во процесот на носење одлуки, при носењето на сите планови ќе се спроведуваат јавни презентации. Одржувањето на денешната стручна јавна расправа по однос на донесувањето на измените на конкретниот Правилник е јасен показател за нашата заложба и отвореност, наведува Министерството за транспорт и додава дека останува посветено на создавање одржливи решенија во корист и на економскиот развој и на јавниот интерес на граѓаните. 

МИА