Иран им се заканува на САД со „невидена“ воена акција поради поморската блокада

Континуираното поморско пиратство и бандитизам на САД во форма на таканаречена поморска блокада наскоро ќе биде одговорено со практична и „невидена“ воена акција, изјави денеска висок неименуван извор од иранските безбедносни сили.

Иранските вооружени сили, кои дејствуваат под команда на штабот Хатам ал-Анбија, велат дека трпението има граници и дека казната е неопходна ако Вашингтон продолжи со својата нелегална поморска блокада околу Ормуската Теснина, објави Прес ТВ.

Неименуван извор на иранската државна телевизија нагласи дека Иран докажал во наметнатата војна дека САД повеќе не се соочуваат со пасивен или предвидлив противник.

„Благодарение на силниот отпор на својот народ и вооружените сили, и мудрото, храбро и решително водство на водачот на Исламската револуција, ајатолахот Сејед Моџтаба Хамнеи, Иран успеа да ги неутрализира и дискредитира сите американски опции на масата“, изјави изворот за Прес ТВ, додавајќи дека воздржаноста што досега ја покажаа иранските вооружени сили имаше за цел да ѝ даде шанса на дипломатијата, дозволувајќи им на САД да ги прифатат условите на Иран за траен крај на војната.

„Оваа пауза требаше да му даде шанса на американскиот претседател Доналд Трамп да ја извлече својата земја од калта во која се наоѓа моментално. Меѓутоа, ако американската тврдоглавост и заблуди продолжат, а условите на Иран бидат отфрлени, непријателот наскоро треба да очекува поинаков одговор на тековната поморска блокада“, рече неименуваниот безбедносен извор.

МИА