Галевски е јунакот на Алкалоид во ремито со шампионот Еурофарм Пелистер

Со одбраната на седмерецот во последните секунди голманот на Алкалоид, Иван Галевски успеа да донесе еден бод за својата екипа на гостувањето кај првакот Еурофарм Пелистер – 26:26. Ова беше последниот дуел од 14.коло од Супер лигата, а два ривала по вторпат во првенството играат нерешено.

Почетокот на дуелот беше во знакот на битолчани, но Алкалоид брзо ја врати неизвесноста. На полувреме Е.Пелистер стигна до предност од четири разлика – 17:13. На почетокот на вториот дел домашната екипа стигна и до водство од седум разлика 23:16 (41.минута). Тренерот на Алкалоид Кирил Лазаров во игра го внесе голманот Иван Галевски што беше најава за резултатски пресврт. До крајот на натпреварот Алкалоид успеа да ги изедначи резултатот и со голот на Игор Георгиев (6/6) изедначи на 26:26. Во последниот напад битолчани се изборија за седмерец, а ударот на Богдан Радовојевиќ, Галевски го одбрани.

Дејан Манасков кај Е.Пелистер со 9 голови беше најефикасен, додека кај Алкалоид Марко Стојковиќ постигна 8. Никола Митревски на голот на Е.Пелистер имаше 13 одбрани, додека Галевски заврши со 7 (два седмерци).

Вардар е прва на табелата со 28 бодови, пред Еурофарм Пелистер со 24, додека Охрид и Алкалоид имаат по 21.

МИА